د ۱۳۹۴ کال د چنګاښ په ۱۸ نېټه، سکاټلنډ د ۲۰ آوریز نړیوال جام په مقدماتي پړاو کې د افغانستان او هالنډ ترمنځ د دوهمې سیالۍ کوربه دی. دا سیالۍ د ایندبرګ ښار په ګرینچ لوبغالي کې ترسره کېږي. لمر ټلویزیون به دا سیالۍ وروسته له غرمې په ۵ بجو باندې خپره کړي.
د افغانو شنونکو د وړاندوینې پر بنسټ په دې لوبه کې افغانستان د بریا د ډېر چانس درلودونکی دی ځکه چې هغوی په دې وروستیو کې په څو نړیوالو ټورنمنټونو کې لوبه کړې ده. همدارنګه هغوی د۱۳۹۴ کال کرکټ آی سي سي په نړیوال جام کې ګډون کړی و، هغه ځای چې آسټرالیا په کې اتله شوه. په داسې حال کې چې هغوی په نړیوال جام کې بایلونکي شول خو په دې ورزش کې د شور ډکې لوبې سره یې د کرکټ د زرګونو مینهوالو زړونه لاس ته راوړل. په ټوله کې، افغانستان په ۲۵ شل آوریزو سیالیو کې ګډون کړی، چې ۱۲ یې ګټلي او ۱۳ نورې یې بایللې دي.
په داسې حال کې چې هالنډیان هم څو لسیزې کېږي چې د کرکټ په لوبو کې ګډون کوي او د کرکټ څو پیاوړي لوبغاړي یې هم نړۍ ته ورپېژاندلې دي خو بیا هم ډېر بریالي نه دي او د همدې لپاره غواړي چې د کرکټ په ډګر کې یوه نړیواله بریا ترلاسه کړي، په اوس وخت کې هغوی ۳ پرلهپسې بریاوې په خپله کارنامه کې لري.