نن شنبه د ۱۳۹۴ کال د تلې څلورمه د افغانستان روشن غوره لیګ د ښځو د ټورنمنټ له لومړۍ ورځې سره سمون خوري. ټاکل شوې ده نن سهار لس بجې د کابل او بامیانو د ښځو د لوبډلو تر منځ لوبه تر سره شي. کابل د تیر کال په لوبو کې اتلولی ګټلې وه خو بامیان بیا دریم مقام تر لاسه کړی وو. د سږ کال په لوبو کې د ټولو لوبډلو د استعداد کچه سره نږدې شوې او ټول ټیمونه په بیلانس کې دي، دا په دې مانا ده چې د لوبو پایلې به ډيرې سره نږدې وي او مینه وال به خوند ځینی واخلي. ننۍ لوبه د سهار په لسو بجو د افغانستان د فوټبال فدراسیون په لوبغالې کې تر سره کیږی. تاسو کولای شئ د طلوع او لمر تلویزیونونو او آرمان او آراکوزیا اف ایم راډیوګانو له لارې دا لوبې تعقیب کړئ. مینه وال همدارنګه کولای شي د روشن افغانستان غوره لیګ له ټولنیزو شبکو څخه د دې لوبو مهم خبرونه وګوري.